De léste rèchte lèèn

Gelèk altèèt èbbe vee tèèt be oeëpe as ve de ieëste kirre bedieën koume ver te rippeteire, en da is dan zoe begin maart as de vuigelkes beginne te fluite.

Dan beginne ve te leeze en probeire ve te verstón waffer fillemkes doo in Danny zénne kop afgespélt èbbe as ter zén schrèèfsels op papier gezàtte-n ei.

Dan wit do gedisketeirt uiver de ròlle. Want noo intigge joore begint de popularitèèt te speile en begin dzje de kuure te zien van diva's en àànder schoeë vòllek, uiver wèèvoul stùkskes moe dee of dèè in miespélt, uiver de weudekes dèè wol of nè ècht Sintrùins zén.

Iederieën ei zénne kerjòng en zén geel stift bèè ver in de tèkste van alles tebèè te schreive en aat te krètse wa òòs ààder wèèdende memoures àànes nemee te góej kóene bèè ààn.

Ma vee zén amatuirs en da betieëkelt da vee nog be van alles beizig zén en sedus èbbe vee voul te doen en wèènig tèèt.

Dan kan dee nè en dan is doo iet gebuirt verwa dèè nè kan, en dan kóene d' àànder wir nè rippeteire omda dèè nè doo is en zoe gón de doage vurbèè.

En dan is juli innins doo!

Mar zoe wèènig doage nog vuir de ieëste vuirstelling!!

Panik in de sirek!!!

Dan rippeteire ve van na mar èlleken dag, as et móet de nacht dour, want de Trùineers verwachte voul van òòs!